قصر الحمراء أبرز الوجهات الأندلسية التاريخية في أسبانيا وواحد من عجائب الدنيا اللي كل مسافر سمع عنه أو شاف شي من صوره تمنى انه يزوره .. و هو من الأماكن اللي متأكد أنك اذا زرته راح تفكر و انت طالع منه متى ترد له مرة ثانية !
قصر الحمراء يمثل قمة حضارة المسلمين في ذلك الوقت لما بنوه قبل 8 قرون و لي الحين الدراسات مستمرة في اكتشاف التطور الكبير و الهندسة الإسلامية الماهرة اللي خلت القصر بهذي الدرجة العالية من الجمال .. و هو حالياً على قمة الوجهات السياحية في أسبانيا بشكل خاص و في أوربا بشكل عام .
كل ما تقرا عنه من معلومات كل ما تنبهر زيادة شلون كانت العمارة الاسلامية بهالتطور .. شلون كانوا بهالذكاء .. شلون يابوا الماء للقصر عن طريق الساقية الملكية من 7 كم و كانت الفكرة انهم صنعوا مجرى للمياه بين الجبال و عبر أنابيب يجري الماء ليصب في خزان القصر و بعدها ينتشر للقصر ، و العجيب ان نظام توزيع الماء ما زال مثل ما اهو فقط غيروا الاسبان المنشئات القديمة بمواد الاسمنت.. شلون بنوا القصر بهالمرتفع …زرت غرناطة و القصر في شهر 11 و بهالتقرير باحط شي عن القصر و أهم المعلومات اللي يحتاجها الزائر
أهم نقطة لازم تعرفونها عن القصر أن حجز التذكرة لازم يكون مبجر وايد .. يعني شهرين أو شهر على الأقل ! ليش ؟ لأن عدد الزوار كبير حيل لي القصر طول السنة و اهم يكتفون بعدد معين يدخل القصر لذلك صعب حيل أنك تاخذ تذكرة مباشرة من القصر نفسه .. بعض الناس يروح غرناطة واهو مو عارف هالمعلومة فيتفاجأ أن ما يلقى تذكرة !! أو ياخذها من مرشدين أو من مكاتب بأسعار خيالية ….و ساعات تبي تحجز من النت فما تلاقي تذكرة لشهر كامل .. فأفضل شي احجز التذكرة حق القصر قبل حجزك لتذاكر السفر أو الفنادق .
الحجز سهل جداً عن طريق موقع
http://www.ticketmaster.es/en/recintos/la-alhambra-de-granada/
Alhambra general تختارون
عقبها تختارون اليوم اللي تبي تروحون فيه ، وتختارون عدد التذاكر
بعدين راح يطلع لكم الفترة اللي تبون تدخلون فيها هل اهي الفترة الصباحية من الساعة 8 أو فترة الظهر بعد الساعة 2
أنا بالنسبة لي افضل الصبح لأن الجو راح يكون احسن و الزحمة أخف و تقدرون تشوفون على راحتكم
بعدين راح تطلع لكم جملة بالاسباني
palacios Nazaries
يعني شنو الوقت اللي تختارونه لدخول قصور النصريين ، و هذا أهم الاجزاء بقصر الحمراء ، و لاااازم تلتزمون بالوقت اللي اخترتوه و لا ماراح تدخلونه ، فعشان جذي اذا اخترتوا مثلاً الساعة 11 لازم تكونون موجودين قبله بنص ساعة عشان الطابور .. و ايضا لازم تنتبهون ان بين قصور النصريين و بين البوابة مشية طويلة فمهم جداً تخلون بينه و بين وقت الدخول على الأقل ساعة ….و عقب ما تشترون التذكرة لازم تطبعونها و يكون معاكم اذا رحتوا الكرت اللي شريتوا فيه التذكرة
دخول القصر
ينقسم القصر إلى ثلاثة أجزاء رئيسية
جنة العريف – Generalife
Alcazaba – القصبه
Nasrid palaces- قصور النصرين
أول ما تدخلون القصر راح تبدون من جنة العريف و لازم تلاحظون ان التذكرة لما تشترونها يكون فيها دخول جنة العريف لأن راح يطلبون منكم التذكرة …..جنة العريف كانت متنزه و متنفس سلاطين غرناطة و القصور الصيفية لهم و من خلال جنة العريف تقدر تشوف القصور في الجهة المقابلة. …و ابداع تناسق الماء و النوافير و الأشجار و الأزهار شي خيالي لا يمكن للصور انه تعبر عنه
و دائماً في القصر راح تلاحظ النقوشات الإسلامية و الآيات القرآنية و أبيات الشعر مكتوبة بفن اسلامي عالي .. و كلمة ” لا غالب إلا الله ” راح تتكرر معاك في كل مكان لأنها كانت شعار بني الأحمر اللي بنوا القصر
القصبة
كانت القصبة هي مكان للحراسة و مبنى للجنود …. و مكان القصبة يكون بجانب قصور النصريين فأفضل تدخل القصبة و بعدها تدخل قصور النصريين . و القصبة هي أقدم بناء بني في الحمراء و من خلالها تقدر تشوف مدينة غرناطة و القصر من زوايا ممتازة للتصوير. و من القصبة راح تطالع حي البيازين التاريخي ، و حي البيازين هو المنطقة المقابلة لقصر الحمراء و هو آخر الأحياء التي سكنها المسلمون في غرناطة و مازال يحتفظ بالكثير من التفاصيل الأندلسية و حتى البيوت العربية القديمة و بعضها تحول لمتحف ممكن زيارته و زرت واحد منهم اسمه ” بيت الظفرة “. و في عام 1994 تم ادراج ” حي البيازين ” ضمن مواقع التراث العالمي من اليونيسكو.
قصور النصريين
هذا من أهم الاجزاء في قصر الحمراء و اللي تختار وقت دخولها لما تحجز التذكرة ، و تعتبر من أجمل الأماكن في القصر من ناحية النقوشات و روعة البناء. و في هذا الجزء راح تلاقون ” بهو الأسود ” و هي تماثيل أسود مصنوعة من الرخام ، كانت فكرتها ان اللي يشوفها يعرف الوقت من خلالها ، فيحيط بالحوض 12 أسد و كانت المياه تخرج كل ساعة من أسد لما تصير الساعة 12 و بعد الساعة 12 تنقص و هكذا .
الجولة خذت مني تقريباً 4 ساعات و فعلاً ما تمنيت انها تخلص ، و أول شي فكرت فيه أول ما طلعت متى راح أيي مرة ثانية ! لأنه تحفة معمارية هندسية إسلامية ما تتكرر ..
(Albaicín ) اهي ساحة في حي البيازين ( Mirador San Nicolas ) من الأماكن المهمة في غرناطة
تطل على قصر الحمراء و فيها مجموعة من القهاوي و المطاعم تطل بمنظر روووعة على القصر. .يعتبر أحسن مكان في غرناطة عشان تاخذ صورة حق القصر و خاصة محترفين التصوير انصحكم تاخذون الترايبود و تستمتعون بالصور الليلية للقصر من هذا المكان .. و بنفس المكان راح تلاقون مسجد مبني حديثاً بطراز جميل جداً و أيضاً في المسجد ساحة تطل عالقصر بمنظر و لا أروع.. …و نصيحة حق أي واحد يخطط حق زيارة أسبانيا و خاصة الجنوب أنه يحط قصر الحمراء من ضمن خطة الزيارة لأنه فعلاً مكان يستحق الرحلة و التجربة .
” Fontecruz Granada ” آخر نقطة : الفندق اللي سكنت فيه اسمه
انصح فيه اللي حاب يروح موقعه ممتاز و الموظفين وايد ممتازين و خدومين حال و يساعدونك بالمواقع و الاماكن اللي حاب تروح لها
